I platani de Via Mameli

I platani de Via Mameli

…e mussi e careti de lavandare,
proprio lì soto a sponsar a l’ombrìa:
un goto a i omeni, e da na fontana,
fata a boca de leon, aque ciare

par i mussi e lavandare e butini:
che spiansade, apena fora da scola!
I platani, come ale, i ne tegnea
soto, come la cioca, i so pulsini …

Rideva rami e foie, pieni de osèi,
parlaa i platani con ci volea scoltar,
el tran e el trenin che le infumegava,
el quel “ciuf-ciuf” se perdeva tra i rami.

Bordel del trafico, osei solo in gresta,
i platani i fasea fadiga a respirar.
“I-è gran maladi”- i-à dito –i esperti…
…  se i tàia i rami, de l’albaro sa resta?

I platani i par, adesso, de i spetri:
nudi, sensa brassi: i fa de pecà!
E i me ricordi i va, i vola nel vento:
l’ostaria “ai Platani” no’ la ghè più,

morte le lavandare, sparì el Loril,
la fontana co’ la testa da leon,
i platani i-è pilastri de cemento:
na storia, ma, forsi l’è un monumento …
a la memoria…
Bruno Etrari